بفضل الله

"قل بفضل الله وبرحمته فبذلك فليفرحوا هو خير مما يجمعون"

لا يسعنى فى هذه اللحظات الا ان استجيب للأمر فى الاية و اقول "بفضل الله "..... بجد كل اللى بيحصلنا بفضل الله

كل الاحداث الحلوة اللى بتمر بينا بفضل الله

الحقيقة اليومين دول بفضل الله تمر عليا عدة احداث حلوة كتير لكنى هشارككم حدث مرور سنة على مدونتى الجميلة الرقيقة الشقية

شقاوة شعب

يعنى شقاوة شعب كبرت وبقى عندها سنة .. وطلعلها سنتين تحت ونص سنة فوق

سنة اتعرفت فيها على ناس كتييييير مدونين وناشطين على الانترنت ... اثروا كتير على افكارى وثقافتى ومتابعتى للاحداث

كان اغلبهم ناس تستحق انها تتعرف وكان شرف كبير ليا فعلا انى اتعرفت عليهم على اختلاف توجهاتهم وافكارهم

وقلة قليلة كانت هى الزبد .. ورب العزة تبارك وتعالى يقول

"وأما الزبد فيذهب جفاءَ وأما ما ينفع الناس فيمكث فى الارض"

خلال سنة من التدوين ...لاحظت بعض الملاحظات

1- انتشار التدوين بصورة مذهلة فى مصر بين الشباب ودى حاجة مبشرة جدا وجيدة وظاهرة تستحق المتابعة

2- زاد التواصل بشكل سريع بين المدونين وده أدى لكثير من التنظيمات والمؤتمرات والتجمعات اللى تبنت قضية معينة واشتغلت عليها وده برضه شئ رائع لانه بيعزز دور المجتمع المدنى

3-مع الاسف اغلب المدونين المصريين يدوروا فى نفس فلك التدوين وقليل لما تلاقى فكرة جديدة للمدونة او اسلوب مختلف للعرض

4- لما بيحصل حدث كبير فى مصر ... تقريبا كل المدونات بتكتب عنه فى نفس التوقيت

5- لسا محتاجين كمدونين وكشباب مصريين نتعلم اكتر اسلوب الحوار ونفهم بعض ونحترم بعض على اختلاف افكارنا وتوجهاتنا

ده رب العزة تبارك وتعالى قال " ولا يزالون مختلفين الا من رحم ربك ولذلك خلقهم " فالاختلاف سنة الله فى الارض

كفاية كدة انهاردة ملاحظات .. واحب انكم تشاركونى مشاهدة الفيديو ده لشروق الشمس

احتفالا بمرور سنة على مدونتى ... ولان الشروق فى حد ذاته معنى تحقق بفضل اللى فى حياتى هذه الايام

يوم الامتحان .. يحل المرء أو ينام

بمناسبة فترة امتحنات اخر السنة ....هذه الفترة العظيمة المباركة اللى بينزل عليا فيها النوم بشكل مش طبيعى

بركة بقى تقولوا ايه

هذه الفترة تنتهى -فى بعض الاحيان- بالذهاب للامتحان

وهنا مربط الفرس

لانك لما هتروح الامتحان .. ادامك حل من اتنين

يا هتفتكر الاجابة يا اما مش هتفتكر الاجابة

فى حالة افتكرت الاجابة هتمسك قلمك ... وتنطلق .. محدثا به ضجة علمية رهيبة سيقف امامها علماء القرن الحادى والعشرين محتارين مذهولين

فى حالة مافتكرتش الاجابة .. ادامك حل ماتنين

يا هتقعد تعيط (هيغمى عليكى لو بنت) ....يا هتنام

فى حالة ان دموعك اسعفتك وعيطت (دماغك اسعفتك ودختى) يبقى ادامك حل من اتنين

يا اما هتصعب على المراقب فيسيبك تتكلم مع اللى جمبك ... وساعتها هيبقى شكلك مش حلو خااااالص

يا اما مش هتصعب عليه وهيناديلك رئيس اللجنة يشوفله صرفة معاك

فى حالة بقى ان دموعك ماسعفتكش وقررت انك تنام ... فادامك حل من اتنين

يا ينزل عليك الالهام وتشوف الاجابة فى الحلم ... وده فى حالة ان الست الوالدة لحقتك بدعوتين وانت ع الباب

يا مش هينزل عليك الالهام وهتشوف حلم تانى تدور احداثه فى شهر 7 .. وورق ابيض فى ابيض متعلق على حيطة بيضااااا

وفى نصه دايرة سودة غريبة مكتوب فى نصها .... ض

******

مازلت سيادتك لسا نايم ... نايم ...نايم

وهنا هتحصل حاجة من اتنين

يا هتقوم فجأة بعد ما شفت الاجابة فى الحلم وتجرى تكتبها فى اخر 10 دقايق مستخدما خط اشبه ما يكون

"بلوحة فنية تشكيلية لحركة المرور المصرية"

يا اما هتقوم مفزووووع على صوت غريب طالع من حنجرة محشور فيها ضفدع

وبيقولك : الوقت انتهااااااااااا

وفى جميع الحالات ... هتسلم كراستك النضيفة اللى زى الفل وانت تردد

انا لله وانا اليه راجعووون

وربنا يوفقنا جميعا

..

مدخنون ومدخنات

مما لا شك فيه -دى الجملة اللى اتعودنا نبدأ بيها موضوعات التعبير- اننا كلنا دلوقتى ملاحظين زيادة عدد المدخنين فى الشعب

المصرى

بس مش ده الجديد ... الجديد هو زيادة عدد المدخنات فى الشعب المصرى

وده طبعا بعد ما بقت الشيشة موضوة قديمة جدا

تقريبا مش هتنزل الشارع فى اى يوم تقضى اى مشوار من غير ماتقابل عربية معدية ادامك سايقاها ست وفى ايديها سوجارة

ومش هتروح او هتروحى النادى من غير ماتلاقى الترابيزة اللى جمبك عليها اسرة والأم قاعدة فى النص وفى ايديها

السوجارة

الموضوع فعلا زاد بشكل مش طبيعى وفى فترة قصيرة جدا .. والملاحظ انه بين الطبقات الاجتماعية المرتاحة

مما يدل على انها من قبيل " الموضة" او يمكن " المنظرة" او ايا كان التفسير فمش ده اللى محيرنى

الحقيقة اللى محيرنى وعايزاكم كلكم تشاركونى فى تفسيره

هو كيف ننظر للمرأة المدخنة ؟؟؟

بمعنى .... هل نبدأ نناقش المشكلة من باب ان ازاى الستات تمسك سيجارة وتدخن فى الشارع

ده مخالف للحياء .... فين التربية ..... دى المفروض بنت ..... ده غير انها بتتسبب فى فتنة غيرها من البنات اللى هيحبوا يقلدوها

؟؟

ولا

نناقش المشكلة من باب إن حرمانية التدخين عامة .. . على الراجل والست

واضراره الصحية عامة ... على الراجل والست

والمسألة مش مسألة اللى ماسك السجارة ده جنسه ايه .... لكن المسألة مسألة كيف نساعده على الاقلاع عنها ؟؟؟

ياريت بجد اعرف رأيكم بكل حرية وشفافية ونزاهة

-ودى الجملة اللى اتعودنا نسمعها من الحكومة-

..

الى زميلى من الحزب الوطنى

ليا زميل دراسة ينتمى الى الحزب الوطنى ..وهو راجل أكبر منى فى السن بحوالى عشرين عام وماتستغربوش لأن الدراسات العليا فيها كل الاعمار
وفى يوم سألنا الدكتور المحاضر : تعرفوا ايه هى نشأة الحزب الوطنى ؟؟
وطبعا السؤال موجه بشكل خاص لزميلنا ده لاننا كلنا عارفين انه من كبارات الحزب
فأجاب الزميل بكل ثقة : اه طبعا ... الحزب الوطنى اللى هو كان زمان الحزب الوطنى بتاع الزعيم مصطفى كامل

وهنا وقع الجميع بما فيهم الدكتور فى الضحك ... فالعضو الكبير بالحزب الوطنى مايعرفش تاريخ حزبه .. ويربطه بالحزب الوطنى اللى أسسه مصطفى كامل فى عام 1907
وبعدين الدكتورعاد السؤال : ها ياجماعة .. مين يعرف ؟؟
فأجاب احد الزملاء "صاحب توجه اسلامى" بأن الحزب الوطنى اللى موجود حاليا هو فى حقيقته حزب مصر العربى الاشتراكى اللى أنشأ فى 1978 لما اتفتح باب تأسيس الأحزاب فى الوقت ده ..وبعد كدة اتغير اسمه الى الحزب الوطنى الديمقراطى
فكانت اجابة سليمة صدق عليها الدكتور والعديد من الزملاء

قبل ما اقٌولكم واحدة "هل تعلم " هقولكم ان زميلنا من الحزب الوطنى لوجت محاضرة بتتكلم عن تاريخ فلسيطن من الناحية السياسية ...تلاقيه يقول فى تذمر بصوت مسموع : احنا مالنا احنا بس ومال فلسطيييييين ؟؟لو بدات مناقشة بين الزملاء واحد المحاضرين عن الأوضاع السياسية الحالية تلاقيه يقول : انتوا هتنخنقونا ليييييييييه ؟؟
ولو جت سيرة اى موضوع سياسيى ...لازم تلاقيه متذمر ومضايق ...مش عارفة طب جاى على نفسه وبيدرس ليه ؟؟

هل تعلم
هل تعلم ان هذا الزميل هو احد نواب المجلس المحلى عن الحزب الوطنى اللى فازوا بالتزكية فى الانتخابات اللى كانت من كام يوم؟؟
هل تعلم ان هذا الزميل رايح يحلف اليمين يوم الاربعاء القادم ؟؟

حد يقولى ده بقى هيحلف على ايييييييييييه ؟؟

موقف اخر
الدكتور بيتكلم وبيناقش الاوضاع الراهنة ...فمن غيظه غلط فى الذات الحزبية الوطنية الديمقراطية
واحتراما لوجود ذلك الزميل قاله بهزار : اوعك تكون زعلان يا استاذ ...... ء
رد الزميل قائلا : لا ولا يمهمك يا بيه .... النظام قوى ومستمر

وهنا ارد انا بقى على الزميل بكام قصة وحكاية صغيرة ... تثبت عكس نظرية " النظام قوى ومستمر" ء

فرعون

إن فرعون وهامان وجنودهما كانوا خاطئين -- سورة القصص 8
وبالتالى لم يستثنى الجنود من العذاب
ولم يستثنى الجنود اللى قالوا : انا عبد المأمور
ولم يسلم هامان من نفس النهاية المؤلمة لسيده ... لأنه مشى على خطاه واقتفى أثره وسار على منهجه الظالم ...فكانت النتيجة واحدة

السادات

ظلم وتجبر واعتقل وقتل وخاصة فى اخر ايامه
وسب أحد علماء الدين الكبار علنا فى تسجيل مصور
ثم ماذا كانت النتيجة ؟؟ النتيجة جاءت من بين صفوف جيشه

شارون

المخ اللى دبر وخطط وحاك المؤامرات والحروب جاتله جلطة .. تطورت الجلطة الى شلل تام فى الأطراف وصل للجفون

تطور الأمر الى جسد يتعفن رغم ان صاحبه مازال على قيد الحياة

حمزة البسيونى وصلاح نصر
اثنين من زبانية عبد الناصر .... لو حكينا على قصص تعذيبهم للمعتقلين فى سجون عبد الناصر ستقشعر الأبدان وتدمع العيون
حمزة البسيوني بلغ به التجبر والطغيان إلى حد أنه كان بيقول للمعتقلين من اصحاب التوجهات الاسلامية وهو بيعذبهم حينما يستغيثون بالله : فين الهكم ده عشان أحطه في الحديد !!!!! ء

حمزة البسيوني وهو خارج من القاهرة إلى الإسكندرية خبطت عربيته فى شاحنة شايلة حديد فدخل الحديد في جسمه، من أعلى رأسه إلى أحشائه، وماقدروش يطلعوه إلا حتت

أما صلاح نصرفجاتله أكثر من عشرة أمراض مؤلمة، مزمنة ولم يجد له الطب علاج ، لحد ما مات سجين في زنـزانات زعمائه اللى كان بيخدمهم
"إن الله ليملي للظالم، حتى إذا أخذه لم يفلته" حديث


أبو جهل

أكثر من آذى النبى صلى الله عليه وسلم وكاد للاسلام والمسلمين.... وهو اللى سماه النبى صلى الله عليه وسلم "فرعون هذه الأمة " أى أمة الاسلام
وفى غزوة بدر جاء صبيان صغيران لسيدنا عبد الرحمن ابن عوف وقالوا له : ياعم اين ابو جهل فاننا سمعنا انه سب رسول الله وقالت لنا أمنا لا تعودا إلا وقد قتلتماه
استغرب سيدنا عبد الرحمن ابن عوف من الصبيين لكنه شاورلهم على ابوجهل
فانطلقوا كالسهام لحد ما وصلوله وضربوه ضربة رجل واحد

صدام

اللى ماكانش حد يقدر يتنفس فى بلده ولا يقول كلمة ولا يعبر عن رأيه

اللى كان بيبوس رجل الأمريكان ..اللى عمل كل حاجة عشان يرضيهم ومرمط شعبه فى حروب مالهاش اول من اخر

هما اللى قتلوه وأعدموه فى يوم عيده

موسوليني

صاحب النظرية الفاشية التى تمجد الأمة –بتطرف- على حساب كل الأفراد
اعدم مع اعوانه السبعة عشر في ميدان "دونجو" بميلانو على ايد الشعب الايطالي عام 1945

ستالين

الدكتاتور صاحب القبضة الأمنية التى لم يكن لها مثيل
وزيره "بيريا" حطله سم فى العشا وبعدها بأربع ايام مات فى مارس 1953

كل القصص والنهايات اللى قلتها لأقول لزميلى من الحزب الوطنى انه ليس من باب الشماتة
وانما من باب : "فذكر فان الذكرى تنفع المؤمنين" ء
ولأقول له ايضا
أن نظامك ليس قوي .. ولن يستمر

ان شاء الله ... وهذه سنة الله فى الأرض وفى الأمم

..

عدنا

انهاردة يبقى مر شهر بالظبط من ساعة اخر بوست كتبته على شقاوة شعب

شهر من اغرب شهور حياتى

شهر من الاحداث المتلاحقة والمؤلمة والمفاجأت والاكتشافات الغريبة

شهر بكيت فيه كتير واحترت كتير واتكلمت كتير وفى نفس الوقت سكت كتير

شهر وصلتنى فيه رسائل كتير ...رسائل بعتتهالى الحياة ..ورسائل تانية ربانية من الله عزوجل

نقلة تانية فى تفكيرى .... ووقفة مع النفس ...ومراجعة لكل احداث الفترة الماضية من حياتى

قبل ما استعرض معاكم جزء من الرسائل اللى وصلتنى ........ عايزة اقولكم يا كل المدونين وياكل المتابعين لشقاوة شعب

بجد وحشتوووونى جدا جدا

ونفسى امر على مدون مدون ومدونة مدونة ارمى السلام واقولهم ان الحياة من غير المدونين ناقصها كتير قوى

وعايزة اقول لمدونتى شقاوة شعب انها وحشتنى بشكل مش طبيعى ...ووحشنى قوى الكتابة فى صفحة كرييت بوست

ووحشنى قوى باسوورد المدونة اللى مش بكتبه غير وانا داخلاها

ووحشتنى قوى تعليقات الناس وردودى عليهم

مش عارفة ازاى قدرت اعيش الفترة اللى فاتت من غير شقاوة شعب

وهى الحياة ايه غير شقاوة شعب

بالمناسبة ....... بكرة شعب مصر هيتشاقى شقاوة كبيييرة قوى ماجربهاش قبل كدة

اضرااااااب .... سيدى يا سيدى على شعب مصر اما يتحرك ...مارد ان شاء الله

وبمالناسبة برضه عايزة اشكر كل الناس اللى علقت فى بوست

"كم هو مؤلم ذلك الألم"

وبجد تعليقاتكم غالية عليا قوى

تعالوا بقى نرجع للرسايل وناخدها كدة رسالة رسالة

الرسالة الأولى

احيانا بنتعامل مع الله عزوجل من منطلق "هو انا مش من حقى كذا كذا" وكأنه حق مكتسب

ومش واخدين بالنا ان لو ربنا سبحانه وتعالى عاملنا على اساس الحق والمستحق هنضيع لان ذنوبنا فى حقه "عزوجل" كفيلة باننا نروح ورا الشمس وكفيلة باننا مايكونش لينا اى خير عنده -سبحانه وتعالى

لكن لما بنتعامل معاه من منطلق الامل فى رحمته .... بنلاقيها اوسع مما نتخيل

الرسالة التانية

قد ايييييه الدنيا دى صغيرة

صغيرة قوى قوى لدرجة تخنق ....ومافيش حاجة فيها بتستخبى

فاللى هيكذب مسير الدنيا تلف تلف وكذبته تبان ...بأى طريقة مباشرة او غير مباشرة

ودى مش حاجة حلوة ابدا ابدا ........ اقصد صغر الدنيا

لان احيانا بنتمنى اننا مانكتشفش كدب اللى حوالينا .... لأن يمكن الكدبة طعمها حلو

يا خساااارة

الرسالة الثالثة

الناس الاكثر إبهارا ...... هم الاكثر قدرة على اخفاء عيوبهم

يعنى فى الناس بنقابلهم فى الدنيا ....يااااااه ....نجوم

الناس دول مستحيل مايكونش عندهم عيوب ..لكن الفرق بينهم وبين غيرهم انهم بيقدروا يداروا عيوبهم

اما التانيين فعيوبهم باينة عليهم و بالتالى مالهمش بريق ولمعان

وعشان كدة صدمتنا بتبقى كبيرة فى "النجوم" دول عن الناس التانية

الرسالة الرابعة

مافيش حد سوى نفسيا مية فى المية

طالما عاش فى وسط مجتمع وبيئة وحكمته ظروف واحداث ... يبقى اكيد اثرت على نفسيته ايجابا فى جزء وسلبا فى جزء تانى

وبالتالى داخل كل منا كلاكيع وفيونكات غريبة الشكل والمضمون ...يمكن مش باينة ومش عارفينها لان ماجاش الحدث اللى يظهرها على السطح

لكن اول مابيجى الحدث المناسب ...اللى ممكن مايجيش الا بعد سنين طويلة من عمر الانسان

ساعتها هتتجلى بوضوح فيونكاته الكامنة فى صميم ونغاشيش عقله

الرسالة الخامسة

ربنا عارفنا

اه والله عارفنا ....وعارفنا اكتر من نفسنا

احيانا بيتهيألنا اننا عايزين حاجة قوى قوى ....بس ربنا عارف اننا فى حاجة تانية عايزينها اكتر بس مش واخدين بالنا لانها

الحاجة التانية - لسا ماظهرتش فى حياتنا

بس ربنا بقى علام الغيوب ...عارف اللى جاى ...وبالتالى عارف ساعتها هيكون ايه اختيارنا
عشان كدة مانفذش طلبنا فى ساعتها لانه -سبحانه وتعالى- عارف رغباتنا اكتر منا

اظنكم دلوقتى بتقولوا ايه الطلاسم دى ...وهى ايه الحكاية بالظبط

لكن اللى طالباه المرادى ان ماحدش يخمن

اه ماحدش يقول فى باله ...واضح كدة ان القصة هى كذا كذا

لانى ببساطة هقوله غلط

المهم ....ومن غير مانقول القصة ايه ...حاولوا تاخدوا الكام رسالة دول تحفظوهم فى عقلكم وقلبكم

ومسير الايام تمر وتثبتلكم انها كانت رسائل فى الجون

ووحشتونا

..

كم هو مؤلم ذلك الألم

استحلفكم بالله ان تتبينوا

الحقيقة الواحد مش عارف يبدأ منين ولا يصيغ كلامه ازاى

مش بكتب البوست ده عشان اشرحلكم مظاهر المجزرة التى تحدث فى غزة الان و كم مات فيها من الاطفال والنساء

اكيد كلكم عارفين وشايفين فى الجزيرة والقنوات الاخرى

لكن بكتبه عشان اقول لكل واحد او واحدة كتبوا كلمة سيئة او غلطوا فى حق اخوننا الفلسطينين اللى عبروا المعبر لمصر لما اتفتح

اقولهم بالله عليكم تتبينوا

"يا أيها الذين ءامنوا اذا ضربتم فى سبيل الله فتبينوا .. ولا تقولوا لمن القى اليكم السلام لست مؤمنا"

النساء -اية 94

تبينوا الحق من الباطل... تبينوا اللى داخلين ياخدوا اكل يفكوا بيه ولو جزء يسير من الحصار اللى عليهم

من اللى بيخدعوكم ويقولوا دول هما السبب فى الحصار ..دول هما اللى بيقاتلوا فتح

دول هما اللى بدأوا وضربوا صواريخ على اسرائيل

ياللى اضايقتم قوى من دخول الفلسطينين لمصر بعد فتح المعبر وقلتوا دول ضربوا الامن المصرى

ماسمعناش صوتكم ليه لما من كام يوم اتقتلت بنت مصرية برصاص اسرائيلى فى مخها مباشرة على الحدود

ولا هتعملوا زى ابو الغيط اللى سخن قوى على الفسطينين اللى داخلين ياكلوا وقال هقطع رجل اى واحد يدخل تانى او يؤذى مصرى

ال...... مانطقش وقال هقطع رجل اى اسرائيلى يعتب سينا ويدخلها بدون اذن

مع ان سينا كلها يهود داخلين طالعين وبكل حرية

و ال ...... مانطقش وقال هقطع رقبة اى اسرئيلى يقتل مواطن مصرى مع ان البنت ماتت على ايديهم من يومين

ومع انها كانت واقفة على الاراضى المصرية فى وسط عيلتها .. وفجأة سقطت برصاصة فى دماغها

ومع ان ابن عمها المصرى برضه مات قبلها بشهرين برصاص اسرائيلى وماسمعناش نفس لاى مسؤل فى الحكومة

وانتوا ياللى بتقولوا ماهى حماس هى اللى تضرب عليهم صواريخ ؟؟

هى البنت المصرية كمان ضربت صواريخ ؟؟

هما الاطفال اللى كانوا بيلعبوا فى الشارع من كام يوم فى غزة واستهدفهم صاروخ اسرائيلى مباشر وموجه ..هما كمان كانوا بيضربوا صواريخ ؟؟

هى اسرائيل عمرها وقفت قصفها او اجتياحها وتدميرها سواء فى اوقات نشاط حماس او اوقات هدنتها؟؟

ياكل الناس المتحاملة على حماس وعلى المقاومة وعلى اهل غزة

ياكل الناس اللى بيبرروا لنفسهم تقصيرهم فى حق هذه الفئة عن طريق اظهار عيوبها والنبش فيها
يا كل من يرى اهل غزة محاصرين منذ اكثر من سبع اشهر لانهم اختاروا حماس فى انتخابات حرة نزيهة

ياكل من يسمع تصريحات الحكومات العربية وعلى راسها الحكومة المصرية والحكومة الفلسطينية وعلى راسها عباس

ارجوكم

تبينوا

وادعوا

وقاطعوا

وادعموا بالمال وبالغذاء

منافذ الدعم المضمونة كثيرة .. اذهبوا لنقابة الاطباء او اتحاد الاطباء العرب

الوضع اصبح مأساوى ونحن صامتون
والادهى اننا احينا نصبح متحاملون

والكارثة عندما نصبح.................. ظالمون

..

حمد الله على سلامتك يا دكتور

امبارح دكتور ابراهيم الزعفرانى اجرى عملية قسطرة للقلب فى مستشفى الجامعة الجديد

طبعا تحت الحراسة

رحت طبعا جرى ازوره ... صحيح كنت خايفة مايدخلونيش .لكن الامر يستحق المحاولة

بصراحة الامن اللى برة طلعوا زوق جدا وهما دول اللى ينطبق عليهم بشدة فيلم البرئ

دخلونا وقالولنا ماتتأخروش

بجد مهما قلت على احساسى ساعتها مش هقدر اوفى اللحظات دى حقها

الناس اللى سجنوه دول فاكرين انهم اقوياء عشان مقيدين حركته وحريته

مش عارفين انه اقوى منهم بكتييييييييير .. اقوى منهم بايمانه بربه

اقوى بايمانه بفكرته ..ايمان عميق متغلغل فى عقله وقلبه

اقوى بمئات بل الاف الشباب اللى بيحبوه وبيقتنعوا بافكاره

واحنا قاعدين معاه حسام - مدونة أخ جامعة - قاله عايز اتصور معاك يا دكتور

الدكتور رد عليه وقاله وانا كدة فى السرير ؟؟ انا محبش يطلع منظرى ضعيف

فضكنا كلنا وقلناله حضرتك دايما قوى يا دكتور

بجد كنت سعيدة جدا جدا وانا عنده .. وفى نفس الوقت حاسة قد ايه انا صغيووووورة جمب هذا العملاق

ربنا يفك اسرك يا دكتور وتطلع لنا بألف سلامة

اه بالمناسبة

الدكتور إبراهيم الزعفراني أمين عام نقابة الأطباء بالإسكندرية و رئيس لجنة الإغاثة باتحاد الأطباء العرب ورئيس مجلس إدارة مركز ضحايا لحقوق الإنسان وصاحب مدونة من الذاكرة والمنسق العام لمدونة ياللا نفضحهم

وتم اعتقاله على خلفية مظاهرات التضامن مع غزة

..

دلالة ماركة صنع فى الصين

المشهد

بيتنا والباب مقفول وانا قاعدة عادى بعمل اى حاجة ممكن اى حد يعملها فى هذه الحياة

ترن ترن ترن ترن

انا : مييييييييييييين

صوت ركيك قوى : موش حايسة حاكة ؟؟

ابص من العين السحرية

الاقي

عنين قد النقطة عليهم شعرتين سايحين نايحين وفوقهم جبل شااااهق

يطلق عليه فى بعض المراجع الاجنبية

backpack

أقرر انى أفتح الباب

انا : يا قهلا يا قهلا ...اتفضلى يا انسة

هى : شووكرا

وتقوم هابدة الجبلاية اللى كانت فوقها على الارض وتبدأ تفتحها

وهنا المفاجأة

الجبل تحول الى جراب جحا

وطلعت منه حجات كتيييير .. اشكال والوان ...والوان واشكال

هى وبلغة مصرية اخر دلع : شوفى دى .. طب شوفى دى

مش عايزة ده ... طب جربى ده

بصى ده .... ده كوتن مصرى تاويل التييييلة

انا : نعم ياختى .. مش المفروض انك جايبة الحجات دى من بلدكوا ؟؟؟جبتوا طويل التيلة منين بقاااا

هى بنفس اللهجة المصرية اللى تعقد : ما انتوا ادونا كوتن واحنا نعمله هدوم

انا : الله واحنا مانعملوش بنفسنا ليه ؟؟ هاتى ياختى ده بتاعنا

هى : لازم ادفع فلوس اول

انا : ادفع ده ايه ...ده طويل التيلة ده بتاعنا اساسا

هى : لأ ده بتاعنا ...انا جيبته معى من صين

وفضلت هى تشد وانا اشد

هى تقول لأ دى بتاعتى وانا اقولها لأ دى بتاعتى

لحد ما كانت نيللى هتطلعلنا من البيجاما

..

بيتهيألى دلوقتى فهمتوا الصورة وأكيد كلكوا عدت عليكوا لأن الدلالات الصينى دول بيعدوا على كل البيوت

ماشاء الله مافيش حاجة موقفاهم

مافيش معرض فى اى حتة على ارضك يا مصر ماخدوش فيه بارتيشن ولا اتنين ولا تلاتة ولا عشرة

كل حاجة فى الاسواق مكتوب عليها صنع فى الصين حتى السبح والمصليات

حتى السواك مكتوب عليه صنع فى الصين

كان زمان المنتجات بس اللى فى السوق هى اللى ملطوع عليها الورقة المستفزة بتاعة صنع فى الصين

دلوقتى طوروا نفسهم وبعتولنا دلالات ملطوع على عيونهم الضيقة نفس الماركة المستفزة

يعنى مش هتتعب نفسك فى النزول مع المدام للسوق لشراء المستلزمات

ولا هتتعبى نفسك فى النزول مع صحبتك تلفوا 5 ساعات فى السوق عشان تشتروا حاجتكوا

هى هتجيلكم لحد باب البيت وهتلاقوا نفسكم بتشتروا حجات كتيييييييييييييير

نصها ماكنتوش محتاجينها ...بس رخص الاسعار اللى بتقولها هتغريكوا

وتأثرعليكم تأثيرها السحرى ماركة صنع فى الصين برضه

..

مزيكا يا منتخبنا

قبل اى حاجة لازم نقول الف الف الف مبروك لمصر على فوزها بكاس الامم الافريقية
والف مبروك لمصر ان عندها منتخب رائع زى منتخبنا
والف مبروك لمصر ان بينها ناس مجتهدة فى شغلها ومخلصاله وبتأديه بامانة واحساس بالمسؤلية
والف مبروك لمصر ان عندها الحضرى وابو تريكة وزيدان ومتعب

انا عارفة انها ممكن تكون حاجة غريبة وجديدة ان بنت تتكلم فى الكورة وتكتب عنها
بس ده مش حالى لوحدى ... دى حالة جديدة وفريدة من نوعها تعم كل شرائح الشعب المصرى
زماااان ... كان الاهتمام بالماتش دى حاجة تبع اهل الكرة وممكن كمان تكون قاصرة على الشباب اللى بيهتموا بالرياضة
لكن الجديد دلوقتى ان لما يبقى فى ماتش للمنتخب ..يبقى الشعب كله رجالة وستات شباب واطفال وشيوخ
اشتراكى وعلمانى واخوان وسلفى ووفدى وناصرى وحزب وطنى كله بيجرى عشان يلحق يتفرج ع الماتش من اوله ويشجع منتخبنا الوطنى

امبارح قبل بداية الماتش بربع ساعة كنت ماشية فى الشارع اللى كان كله اعلام بطريقة مش طبيعية
الشباب ماشيين بالطبل وجرى ع القهاوى اللى هيتابعوا فيها الماتش
العربيات بدأت كلاكسات من دلوقتى
والجديد بقى (اللى يضحك) ... البنات راكبين عربيات وطالعين من الشبابيك وماسكين الاعلام
ههههههههههههههه

(اهى دى بقى خيبة)

وطبعا بعد الماتش المصريين كلهم كانوا فى الشارع وكأنه فرح جماعى كل المصريين شاركوا فيه
صوت الكلاكسات والطبل مابطلش طووول الليل

***********

ولما نقول منتخبنا ...يبقى لازم نقول المدرب حسن شحاتة
اللى نقل المنتخب نقلة تانية خااالص
وبعد ماكنا زمان نتفرج على الماتشات اللى فيها المنتخب كتأدية واجب
او عشان اخواتنا الصبيان مش راضيين يغيروا القناة
دلوقتى بقينا بنتفرج باستمتاع

وبعد ماكانت كلمة المنتخب المصرى بتفكرنى على طول بالسلحفاة
لان الحركة والاداء فى الملعب كان بيتسم بالدلع
دلوقتى بقى فى سرعة عالية جدا فى الحركة تفكرنى بالنمر و بماتشات اوروبا

***********

وماينفعش اتكلم عن المنتخب والماتش والكاس من غير ما اتكلم عن صاحب الكاس
واللى رفع راسنا طووول البطولة
محمد ابو تريكة
اللاعب المؤدب الوقور المتدين
اللى اول ما يدخل جون ينزل فى الارض يسجد
ولو شاط الكرة ومادخلتش فى الجون تلاقى ايده تترفع للسما فى نص الملعب ويقول يااارب

ولو كنتوا مدققين شوية ساعة ما المنتخب اخد الكاس هتلاقوا ان كل اللاعيبة شالته وتسابقت عشان تاخده من بعضها واحمد حسن شاله وجرى بيه
دوروا على ابو تريكة فى الكام لقطة دول
مش هتلاقوه
وتحدى

احد اللاعبين عملوا معاه لقاء على التليفون بعد انتهاء الماتش فبيقول ابوتريكة قالنا امبارح احنا هندخل الماتش بنية ادخال السرور على قلوب الشعب المصرى
وفعلا جزاكم الله خيرا جميعا
ادخلتوه وبشدة
والشعب المصرى كان فعلا فى اشد الاحتياج لهذا السرور

*****************

بعد الماتش والكاس وصل للمنتخب المصرى مالا يقل عن 10 مليون جنيه كتبرعات ومكافأت من جهات مختلفة
منها النساجون الشرقيون .. والوليد ابن طلال .. وراديو وتلفزيون العرب
ومحمد ابو العينين .. وغيرهم وغيرهم

الحقيقة الفريق يستاهل كل تقدير
لكن برضه كبر المبلغ يخلى الانسان يتساءل الف مرة
هل الكرة تستحق كل هذه الملايين فى الوقت اللى الشعب فيه مش لاقى رغيف العيش؟؟
هل الناس دى المتبرعة بالملايين ..كانت هتتبرع بنفس الملايين دى عشان الناس اللى ساكنين فى العشوائيات؟؟
ولا العشوائيات مش هتعملهم دعايا زى ماهتعملهم الكورة ؟؟

***********************

شكر وتقدير

ماقدرش بعد كل الكلام ده انسى اقدم خالص الشكر والتقدير لسيادة الرئيس حسنى مبارك
الذى ازعم انه احد الاسباب الرئيسية للفوز

هتقولولى ليه ... هو كان عمل ايه ؟؟
هقولكم وبكل بساطة ان اللى عمله كتير

اللى عمله هو انه

محضرش الماتش

لذا شكرا سيدى الرئيس

**************

والف الف مبروك النصر لكل المصريين
وعقبال يااارب مانحقق نصر مشابه فى المجال الاقتصادى والسياسى

ونبقى بلد كدة عليها القيمة فى كل حاجة

...